ड्रग्सको महामारीमा म सिक्किमेको भविष्य खोज्दैछु

ड्रग्सको महामारीमा म सिक्किमेको भविष्य खोज्दैछु

(सागरमणि ढकाल 21.02.2020) 

घाँटीमा कालो नक्षत्रको आकार खोपेर 

लामो केसराशीमा गेरुवा रंग मलेर 

आँखाका परेली उघिर्न नसक्ने अवस्थामा 

म मेरो भविष्य खोज्दै छु॥

हातका पाँचै औंलामा अंग्रेजीका काला अक्षर "D E V I L" खोपेर, बिमार नभएता पनि दुखेको बेला खाने औषधि टन्न धोकेर, 

सुकेका ओठ लर्बराएको अवस्थामा 

म मेरो अभिमान खोज्दै छु॥

हातका नाडीमा कालो अक्षरले आफ्नो नाम खोपेर, 

नसाहरुबाट रगत संग बर्जित पदार्थहरू मिसाएर, 

आफ्नै  नाडीमा खोपेको नाम पढ्दै अचेत अवस्थामा, 

म आफ्नो पहिचान खोज्दै छु॥

आमा बाबुले कमाएको पैसा चोरेर,

स्कुलमा तिर्नुपर्ने पैसा माँसेर

रोजगारको कुनै ढोका ढक्ढक्याँउने हतियार नबोकी 

बेरोजगारीको कुमलो बोकेर 

म आफ्नो भाग्य खोज्दै छु॥

संसारमा जन्मिएको मुल्य नबुझेर 

पैसा कमाउने सजिला माध्यमहरु खोजेर 

ब्राउन सुगरले आफैलाई अनि समाजलाई रोगी बनाउँदै 

म मेरो नानीहरुको भविष्य सपार्दैछु ॥

युहान शहर कोरोनाले सखाप पारे सरह 

इबोलाले अफरिका तबाह पारे सरह 

ट्याबलेट, कालो, कोकैन, ब्राउन सुगरले 

सिक्किमलाई स्वाह पारेर 

ड्रग्सको महामारीमा म सिक्किमेको भविष्य खोज्दैछु॥