अब त तिम्रो बा सित पैसा छ।।

अब त तिम्रो बा सित पैसा छ।। 

(सिद्धिचरण श्रेष्टको "तिम्रो बासित पैसा छैन" भन्ने कविताको आधुनिक संस्करण- सागरमणि ढकाल 19.11.2019) 

मिठो खान र राम्रो लाउन 

पुस्तक च्यापी डटेर हिँड्न

बाबु तिमीले पाएकै छौ 

मानिस बन तर कुकुर नबन 

       अब त तिम्रो बा सित पैसा छ।। 

दिनभर जोतनु पर्दैन अहिले 

पहिला भन्दा राम्रो छ चाला 

हाम्रो पेट भरपुर भरिन्छ 

अब त दिएर खान सकिन्छ 

       अब त तिम्रो बा सित पैसा छ।। 

जाऊ स्कूल अब फेल नभइ 

अब्बल नंबर पढेर ल्याउ 

ट्याबलेट नखाँइदेउ, चोरेर नहिड्

संगत राम्रो गर बाबु 

       अब त तिम्रो बा सित पैसा छ।। 

विज्ञान, भूगोल, इतिहास पढ़दै 

समाजको निमित्त राम्रो काम गर्दै 

माथी उठिरहेका नेपालीहरूको 

नयाँ पुस्तक लेख लौ बाबु 

      अब त तिम्रो बा सित पैसा छ।।

नाना थरिका व्यापार छन जत्ती 

नौंलो व्यवसाय कति हो कत्ती 

लिइकन ज्ञान, लिइकन शिक्षा 

अवसर हजार खुल्ला छ बाबु 

     अब त तिम्रो बा सित पैसा छ।।