म चाउरी पर्ने थालेको धेरै भएको छैन।

म चाउरी पर्ने थालेको धेरै भएको छैन। 

(सिक्किमको बाँझिएको जमिनको सन्दर्भमा-

सागरमणि ढकाल-28.12.2018)

खानको लागि नुन मात्र किन्ने र अरु सबै आफै फलाउने महान किसानहरुका सन्तानले

मेरो छाती भरि केहि नगरी बुगुन्द्रै फ्ल्ने 

सिमल तरुल र पिँडालु समेत नरोपेर 

किन्न थालेपछि

म चाउरी पर्ने थालेकी हुँ।। 

पुर्वज किसानहरुले फलाँउले

अट्टे, स्यालमुखे, झपकाहरु 

थाहै नपाइ आसियाना, के.आर.टी,  मोहन भोग र  सर भोग भएपछि

म चाउरी पर्न थालेकी हुँ। ।

कोलमा पिनेर मग मग बासना आउने तोरीको तेल त्यसै एक बटुका पिएर पचाइदिने 

बलशाली किसानका सन्तानहरुले 

सफोला गोल्ड र धारामा भुटुन पडकाँउन थालेपछि 

म चाउरी पर्न थालेकी हुँ।। 

फारसमा गाई भैँसी चराएर 

बेलुका भात पकाउन अल्छी लाग्दा

एक माना चामललाई तिन किलो दुधमा पकाएर

एकलै सर्ल्याम-सर्ल्याम खाएर पचाइदिने 

किसानका सन्तानहरुले 

पुजामा समेत अमुल गोल्डले बनिएको खिर 

चढाँउन थालेपछि 

म चाउरी पर्न थालेकी हुँ।। 

गाईको मलले बारी नै कालो बनाएर, जोतेर

कोदो, फापर, मकै, गहुँ छरेर

ढिडो अनि रोटी- दुध, दहि, मोइ, घिउ संग 

गम गम खाने किसानहरुका सन्तानले 

कोर्न फ्लेक्स र प्याकेटको दुध खाँदा पनि 

पखाला चल्न थालेपछि 

म चाउरी पर्न थालेकी हुँ।। 

ब्याँसी खेतमा असारमा जहिले नै मेला सरह हुन्थ्यो, 

त्यहि खेतमा 200-300 मुरी धान फलाउने कर्मशिल किसानका सन्तानहरुले 

त्यहि बाझो, चिरा परेको खेतमा आयोजना गरिएको 

"ब्याँसि विन्टर कार्निभलमा" 

सिलिगुडीको एल एस चामलबाट बनिएको भाती जाँडलाई 

"ओरगेनिक राइस वाइन" भनेर खान थालेपछि 

म चाउरी पर्न थालेकी हुँ।। 

उद्धमशिल किसानका सनतानहरु 

बजार कुर्न थालेपछि 

ढिकुटीमा धान नभरेर 

औषधिको खोलमा औषधि भर्न थालेपछि 

अन्न कोषलाई सम्पति नमानेर 

धनराशिलाई सम्पति ठान्न थालेपछि 

म चाउरी पर्ने थालेकी हुँ।। 

तरै पनि कुरेर बसिरहेकी छु

कुनै पाखुरा आउँछन् होला कोट्याउन कुनैदिन 

सुर्ता नगर!! 

निषठुरि हुने छैन म

तिम्रो स्पर्शले नै म

पगलिने छु मलिलो भएर, 

फेरि उरवराउ हुनेछु, जवान भएर।।